ابلكيشن حادى بادى التعليمى
ابلكيشن حادى بادى التعليمى هو أول ابلكيشن تعليمى وتعليمك فى منطقة طنطا التعليميه. طريقك الى النجاح والانشكاح بس خلى بالك فيه حادثه فى اول الطريق عند نزلة كوبرى الغش , الأبلكيشن يعتمد على نظام الكويزات اللى هى اختار مما بين الأقواس وهو احدث نظام تعليمى فى مكان ما. الأبلكيشن ينفع للطالب ولولى الأمر اللى هو بيتنيل يذاكر اكتر من الطالب نفسه. وعلشان يعرف يشوف مستوى الموكوس ابنه اللى بيضرب فلوس الدروس فى جيبه. ولو الطالب نجح فى الكويز باكتر من 85% هيكسب نقط اعلانيه يبيعها للمدرسين , ابلكيشن حادى بادى التعليمى - أبقى قابلنى لو فلحت
تفاصيل الابلكيشن :
لماذا هذا الأبلكيشن :
عملت الابليكشن ده علشان بنت اختى الخايبه النايبه الفاشله الموكوسه المنيله على عينها واللى بتاخد دروس فى كل المواد حتى فى الحاسب الالى وبتذاكر طول النهار والليل وفى الاخر طلعت السابعه مكرر - والسبب الاهم انى احافظ على ارواح المتفوقين - ليه بقى ؟ لإن الموكوسه كانت متغاظه من بنت شاطره وشطوره وقمر وقموره ومش بتكدب على خالها وقامت رازعاها عين فالبنت وقعت من على الموتوسيكل واتدشملت ولسه بتتعالج ومستواها نزل بعد ما كانت "سلت سبيل" النجاح والتفوق وكانت طالعه الأولى.
طريقة العمل :
- الطالب هيفتح الاختبار حسب مرحلته التعليميه
- هيجاوب الأسئله
- لو جاب نسبه أكبر 85% هيكسب نقط اعلانيه
- ممكن يبيع النقط للمدرسين واهو يطلعله بقرشين ينفعوه
- لو جاب نسبه أقل من 85% يبقى خساره فيه الأكل ويطلع من المدارس ويتعلم له صنعه تنفعه وتنفع اهله
- ممكن ولى الأمر يختبر بيه عياله المواكيس ويشوفهم بيذاكروا ولا قاعدين يلعبوا
ما فائدتها ؟
معرفش, بس لو انت لقيت لها فايده ابقى قول قبل ما تفطر فول.
شارك الأبليكشن على الزوشيال ميديا :
تعليقات
إرسال تعليق